Pour Vashti, et Mercer Cook
tre a katër herë në njëzet e katër orë
më vjen sërish fëmijëria ime
në një lemzë që troshit
instinktin tim
si hafija rrugaçin
Gjëmë
Më flisni për gjëmën
më flisni për të
Ime më që i kërkonte të birit një qëndrim shumë të mirë në tryezë
Duart mbi tryezë
buka nuk pritet
buka thyhet
buka nuk çohet dëm
buka e Zotit
buka e djersës së ballit të Atit tuaj
buka e bukës
Kocka hahet me të matur dhe me kujdes
stomaku duhet të jetë i shoqërueshëm
dhe çdo stomak i shoqërueshëm
bën pa gromësitur
piruni nuk është kruajtëse dhëmbësh
ndalohet të fshihen buzët
në dijeni
në sy të gjithë botës
pastaj mbahuni dhe drejt
një hundë e rritur mirë
nuk fshin pjatën
E pastaj e pastaj
e pastaj në emër të Atit
të Birit
të Shpirtit të Shenjtë
në fund të çdo vakti
E pastaj e pastaj
e pastaj gjëmë
më flisni për gjëmën
më flisni për të
Ime më që i kërkonte të birit memorandum
Nëse s'e keni mësuar mësimin e historisë
nuk do të shkoni në meshë
të diel
me rrobat tuaja të së dielës
Ky fëmijë do të bëhet turpi i emrit tonë
ky fëmijë do të jetë qoftë-largu ynë
Heshtni
Ju kam thënë apo s'ju kam thënë se duhet të flisni frëngjisht
frëngjishten e Francës
frëngjishten e frëngut
frëngjishten franceze
Gjëmë
Më flisni për gjëmën
më flisni për të
Ime më që i kërkonte të birit
një djalë mamaje
Nuk e përshëndetët komshijen
këpucët i keni ende të ndotura
dhe se mos ju gjej në rrugë
mbi bar a në Savanë
nën hijen e Monumentit të të Rënëve
duke luajtur
duke lodruar me një Filan
me një Filan që s'është pagëzuar
Gjëmë
Më flisni për gjëmën
më flisni për të
Ime më që i kërkonte të birit shumë do
shumë re
shumë mi
shumë fa
shumë sol
shumë la
shumë si
shumë do
re-mi-fa
sol-la-si
do
Mora vesh se prapë nuk kishit shkuar
në mësimin tuaj të vi-o-li-nës
Një banxho
një banxho thoni
si thënkeni
një banxho
thënkeni vërtet
një banxho
Jo zotrote
ta dini se nuk vuajmë në shtëpinë tonë
as ban
as xho
as ki
as tarë
s’janë për mulatët ato
prandaj lëruani zezakëve
Léon-Gontran DAMAS
Pigments, 1937
Nuk ka komente:
Posto një koment