Atdhe dhe arsim

Tirana Calling boton një thirrje nga Ismail Qemali të botuar në vitin 1900 ku ai i fton të gjithë shqiptarët të mos rrinë «këmbë kryq», por të marrin pjesë në përhapjen e shkollave kombëtare në gjuhën shqipe.

Për të shkuar përpara në rrugën e qytetërimit e të përparimit, kemi nevojë për dituri; dhe për dituri kemi nevojë për mësime. Pra kemi nevojë të ngrehim në gjithë Shqipërinë shkolla kombëtare për ta përhapur dhe për t’u lexuar kudo gjuha shqipe. Kjo nevojë shkollash është më e para e reformave që kemi detyrë të kërkojmë. Kurrë një popull nuk mund të rritet më vehte pa shkolla e pa arsim.